Mar 7 | ASO | STEP | Halisaio' evene' masi Zelusalemi numudati' avo'ningeliti mono' gamazi apizi ngimaa' ave linge masi Izesuda vi di gese' ani'.

Mark 7

Zuda Ve O'moso'mi Gamazi Gili Huli Avo'ningeliti Gamazi Gili Dani' Monovo

(Mataio' 15:1-9)

1 Halisaio' evene' masi Zelusalemi numudati' avo'ningeliti mono' gamazi apizi ngimaa' ave linge masi Izesuda vi di gese' ani'. 2 Ne'mine ikevo izipahala zuho linge nete a'ine di lamine' ami noso' nite' ninavo ningani'. A'ine di lamine' amave lani' nene Halisaio' eveneliti monovo'nido' e'meti a'ine noso izamani' nemu' lani'. 3 Halisaio' evenekisi Zuda ve mukikisi nene avo'ningeliti monovo'nidokovo' gili di lute goloduvo elo minalive li a'ine di ato' igi noso izisavo' noso' nite' naa' nave. 4 Ido' noso' nite' maketiloti' meni hizi di igi ma noso izisavo' naa' nave. Ido' nevo' nomive. Avo'ningeliti monovo'ine ato ato' gohi masi masi neine' nene gili daa' nave. A'minguti' ma nene kapusi somosi ido' vapa lapesesi nene mono'inemu' gili nosou' izaa' ani' ve. 5 Ido' Halisaio' evenekisi Zuda veti avo'ningeliti mono' gamazi apizi ngimaa' avesi Izesu'ni ti' li longo' i-di lani': Gei' izipaha zuho nene avotemotidati' do none' mono' gamazilo' e'metami mini a'mine gamazili'mo lido' igi a'ine noso' izami ha goloduvo ize minivo noso' nite' di naa' nani' nene nanimu' nave. ^{▼▼A'nido' goloduvo ize minivo ve lune' nene haza goloduvo mamu' lamune. Asi Zuda vete gilavo lute do goloso oga' inite' ve li gilani' initekumu' lune' ve.} 6 Ne'mine likevo Izesu' nene ti' lo lo-ngimine': Lengemeni dameni goloso di haleki evene' lamine' gili monaa' nave lengikumu' Isaia' line' ma nene lamine' laani' neive. Aza ti' lo gize neive:

Me aleve nete ve'ine avileloti' neni' gulive'ne di hozi li minaa' nani'za
lu'ine nene nezela milamavo lu'ine've nene hoto' minaa' neive.
7 Haza eveneliti gamazi nene neze gamazi gidini lolo' ogavo
li-ngimi ngimi' igi minaa' nani' nenako
ne'mo nenikumu' nopo'ni laa' nani' nene gopo hazamu' laa' nave.
8 Lingine O'moso'mo lou' gamazi lo huko-lingidine' ma nene huli eveneliti monovo'ine nene di gili' li minaa' nave.

9 Ne'mine losa ti' lo lo-ngimine': Lengi' nene avotingidati' monovo do minelone li O'moso'mi lou' gamazi izi hulato' nene otohato ve gehepeve minikeve. 10 Ne'mine noluvoni' mene lingine ti' iga' angumu' noluve: Mose' aza ma ti' lo lave: Lingine izetingine metinginemu' gilavo dizavo gelekele' lamine' i-ngidivo' minilo. Ido' ma nene ve mali'mo izelehingi melehingi gamazi goloso lo-ngedeline' nene mo bilikevo helelive. 11 Ne'mine lo line'za lingine a'mine line' gamazilo' e'metilizani' aka nene ti' igi hizi tilaa' nave: Evene' malite engi' ize'ninginemu' nehe me'ninginemu' nehe ti' li li ngimaa' nave: Lengi' hize ele' o-lengedo lengemelone' o minine' initete nene kolobani inite' lolo' ogani' nenako ma lengemamolosune. Ido' Kolobani inite' lolo' ogave lani' ne'mi monovo nene ne'mino neive: O'moso'mine molo-dekunivo mo ei' inite've lolo' ogave. 12 Ido' ne'mine lani' ne'mo nene alinge' ize'ningine me'ningine hizi ele' ilisa ikevo ma lingine o've li-ngidikevo ize'ningine me'ningine gelekele' lamine' i-ngidivo' minilo lo Mose' line' gamazilo' e'metilizani' aka nene hize tilaa' neive. 13 Ne'mine ogavo lingine lengi' monovotine nene O'moso'mi gamazilo' di medeli apizi ngimaa' nani' ne'mo nene O'moso'mi gamazi do haza nite' lolo' o-daa' neive. Ido' nevo' nene nomive. Linginela ne'mine monovo nene muki' minaa' neive.

Lute Do Goloso O-daa' Initeliti Monovo

(Mataio' 15:10-20)

14 Ne'mine lo Izesu' evene' muki' gohi asi lo-ngemo ti' lo lo-ngimine': Naza gamazi lo-lengemekuvo mukito' gili gili ngolo' lilo. 15 Inite' naanivo mulungauko lemaa' neine' inite' ne'mo nene luka do goloso o-damoloseive. Lukati' dizaa' neine' ne'mo nene luka do goloso o-daa' neive.

17 Ti' lo lo-ngemo evene' hulo-ngedo numungu' dizavo izipahala zuho nete aneza gamazimu' longo' i-dani'. 18 Longo' i-dikevo ti' lo lo-ngimine': Haza aleve ani' ne'mini linginesi olihe gili guni amahe. Inite' ma naline' ne'mo nene lukau' vo holamo gatungau' lemo ise galeseu' vaa' neinako luka ngelo do goloso amoloseive. Nemu' nene gili lamine' amahe. Ne'mine line' nene noso' nite' muki' nete lute di goloso amilisanako ha nalosune losa line' ve. 20 Ne'mine lo gohi mesi line' ve: Lutinguti' dizaa' neine' inite' ne'movo' nene lutine do goloso o-lengedaa' neive. 21 Naza ne'mine noluvoni' nene lutinguti' goloso nite' ne'minosa dizaa' neingumu' luvoni' ve: Ado' gatine goloso gilaa' ido' umungive alungo gopo ingi monaa' ido' gumine damine oga' ido' evene' ngebele helaa' 22 ido' vene' vemoho' lili' ikeni' nene gopo ingi monaa' ido' initekumu' lumo helepele' oga' ido' monovo do goloso oga' ido' go'ine izo gosoho' nasaha' laa' ido' zogo zogo peleseve' izaa' ido' ve maliti initekumu' mumuzo' ogo lukehe ngebelaa' ido' evene' dovo ledevo' ogo ngemenga laa' ido' hokolize' igi okodine di dizaa' ido' dingani hizo minaa' 23 ne'mine inite' goloso muki' ne'mo nene lutinguti' dizaa' neine' nenako ne'mo nene lutine do goloso oga' neive line'.

Hoinikia Ebetoti' Vene' Mali'mo Izesu'ni Gele Imine'

(Mataio' 15:21-28)

24 Ne'mine ogo aza a'mine ebe' hulo oto Tilo misubou' ebe' nabala vine'. Vo numuno mau' dizo evene' hamolitesi mela nouvongumu' nene gilikelizave lo giline'za aza ngelo halekiline' amine'. 25 Ne'mine neivo vene' mali'mi aluvo ne'mi lulou' nene sikalahu' golosoli'mo dizo minavo vene' ne'mo Izesu' guvele nene gelo lite' lo ogo gizeneu' gubi' ize imine'. 26 A'mine vene' nene Zuda vene' nevoba Silia misubo'mi gahevela Hoinikia alevetinguti' soto' ogo mino nGiliki aleveti monovo'nido' e'meto minine' vene' ne'mo nene ei' aluvo'mi lulouti' sikalahu' goloso nene imisele hulilive lo amuzo molo lo-imine'. 27 Lo-emavo Izesu' aza aneza gamazi ma ti' lo lo-imine': Izipeliti noso' nite' nene ipe' ogo gulo ngemaa' nene edamive. O'moso'mi izipahala Isilaele' aleve do lamine' o-ngedaa' nouvoni' nenako gei' heta ato' vene' do lamine' o-gedeloni' nene edamoloseive losa gele nouve. Nemu' nene noso' nite' nene a'mine izipe nete gana' nalisave. 28 Ti' lo lavo a'mine veneli'mo Izesu' gamazi'velo' do velepe' izo ti' lo lo-imine': Guvekasi ve gaza lamine' laine'za izipelite noso' nite' nanguti' lana ngomo tevoliloti' do'mozine' nene a'mine tevoli'mi sebengu' minaa' ani' gulo nete ha naa' nave. Nemu' nene ha gele nemelesane. 29 Lavo Izesu' lo-imine': Ti' lo laningumu' nene gele gemekuve. Numungala vozo. Sikalahu' goloso nene mo aluva hulo-do vave. 30 Lavo numu'vela vo ningine' nene sikalahu' goloso aza hulo-do vavo izipe nene holomolo' ongo neivo ningine'.

Gala Molavo Gamazi Lo Lamine' Amaa' Ive Ma Izesu' Do Lamine' O-dine'

31 Ne'mine ogavo Tilo ebekuti' tine' molo vo Sidoni ebe' hulo vo Dekapoli misubo ivile' ogo nGalilaia noso ohuda vo heteline'. 32 Vo hetelavo gala molave gamazi lo guno amive nene ele'mizi Izesuda igi anadunu' oko'nolo' do geleliho li agae li li-imani'. 33 Li-imikevo vo evene' nizamanguko ele'mize molo ana nedunu' gala lulou' molo gituho' ogo vele nahunolo' do giline'. 34 Do gelo Okulumota vonu' ogo le' izo ti' lo lo-imine': Ehata, leli' gamaziuti' nene ngolo' lozo losa ve. 35 Lavo geto gala ngolo' lavo vele nahuno nene do velepe' izavo gamazi nene lo lamine' ine'. 36 Ne'mine ogavo evene' mukikumu' nene a'mine gamazi nene li soto' amilizave lo lo huko-ngidine'za li soto' ikevo aza gohi o've lo-ngedeka' lo-ngedeka' neivo ingine di naba ika' ika' igi li soto' ika' ika' i'mi vi minani'. 37 Ido' ingine amuzo mili siza li mini ti' li lani': Aza inite' muki' o'mo vine' nene mo laminekovo' o'mo vave. Aza lavo ga'ine molave ingine gamazi gohi nigilavo gamazi lamilizado' i minave netesi nene gamazi ha nilave.